प्रेस मीडिया लाईव्ह:
मुरलीधर कांबळे :
कोल्हापूर - कोल्हापूर जिल्हा न्यायालयात शरण आलेला मटका किंग सम्राट सुभाष कोराणे (वय ४२, रा. शिवाजी पेठ, कोल्हापूर) याला राजारामपुरी पोलिसांनी शुक्रवारी अटक केली. त्याला शुक्रवार(07) रोजी न्यायालयात हजर केले असता न्यायालयाने कोराणे याला १८ फेब्रुवारीपर्यंत पोलिस कोठडी सुनावली. ११ दिवसांच्या कोठडीत पोलिस तपासाला सुरुवात झाली असून त्याचा ताबा राजारामपुरी पोलिसांकडे दिला आहे. दरम्यान कोराणे समर्थकांनी कळंबा कारागृहासमोर मोठी गर्दी केली होती. पोलिसांनी कोराणेला मोठ्या पोलिस बंदोबस्तात कळंबा कारागृहातून थेट सीपीआर रुग्णालय आणि तेथुन न्यायालयात नेण्यात आले.
कोराणे याला ताब्यात घेण्यासाठी शहर पोलिस उपअधीक्षक अजित टिके यांनी गुरुवारी न्यायालयाकडे अर्ज सादर केला होता. त्यानुसार शुक्रवारी सकाळी ११ वाजता कळंबा कारागृहातून कोराणे याचा ताबा घेतला. त्याचा ताबा घेताना त्याच्या समर्थकांनी कळंबा कारागृहासमोर मोठ्या प्रमाणात गर्दी केली. पोलिसांनी ही गर्दी पांगविली. त्यानंतर त्याची सीपीआरमध्ये वैद्यकीय तपासणी करून तेथून थेट त्याला कसबा बावडा येथील जिल्हा व सत्र न्यायालयात मोठ्या पोलिस बंदोबस्तात नेण्यात आले. जिल्हा व सत्र न्यायाधीश डी. व्ही. कश्यप यांच्यासमोर त्याला हजर केले असता कोराणे याला १८ फेब्रुवारी पर्यंत पोलिस कोठडी सुनावली.
यादवनगर येथील मटका अड्ड्यावर कारवाई करण्यासाठी गेलेल्या पोलिसांच्या पथकावर हल्ला झाल्यानंतर पोलिसांनी मटका बुकींची पाळेमुळे खणून काढली होती. एप्रिल १०१९ मध्ये गुन्हा दाखल झाल्यापासून मटका बुकी सम्राट कोराणे फरार होता. या गुन्ह्यातील पोलिसांनी ४४ पैकी ४२ संशयितांना महाराष्ट्र संघटित गुन्हेगारी नियंत्रण कायद्याखाली (मोका) पोलिसांनी यापूर्वीच अटक केली होती. सध्या ते जामिनावर बाहेर आहेत.तर कोराणे आणि मुंबई येथील सावला हे फरार झाले होते. आरोपी कोराणे हा बुधवारी स्वत:हून न्यायालयात शरण आला होता. त्यानंतर न्यायालयाने त्याला न्यायालयीन कोठडी सुनावली होती.
कोराणेचा ताबा राजारामपुरी पोलिस ठाण्याकडे आहे. रात्री उशीरा तपास अधिकारी उपअधीक्षक अजित टिके यांनी कोराणे याच्याकडे तपास सुरु केला. गेली सहा वर्षे तो कोणत्या-कोणत्या भागात रहात होता ? त्याला कोणी आश्रय दिला? यात काही राजकीय व्यक्तींचा सहभाग आहे काय?आणि त्याचे कोणाशी लागेबांधे होते? याचा तपास सुरु केला आहे.
अवैध व्यवसायाचे जाळे कुठे
मटकाबुकी कोराणे याचे अवैध व्यवसायाचे जाळे महाराष्ट्र, कर्नाटकात मोठ्या प्रमाणावर होते. शेकडो जण या व्यवसायात सहभागी होते. फरार असलेल्या काळात त्याने राज्यात अन्य ठिकाणी अवैध व्यवसायांचे जाळे विस्तारले आहे काय? या व्यवसायाचे कोण कलेक्शन करत होते, याचा तपासही पोलिसांनी सुरु केला आहे.
सम्राट कोराणे जवळ उठबस असलेल्यांची आता पासूनच धाकधूक वाढ़ली आहे.तो पोलिस चौकशीत कुणा -कुणाचे नाव घेतो याकडे काहीचे लक्ष लागून राहिले आहे.