प्रेस मीडिया लाईव्ह :
पुण्यात मुसळधार पावसामुळे परिस्थिती गंभीर होत आहे. पुण्यातील अतिवृष्टीमुळे उद्भवलेल्या परिस्थितीबाबत महाराष्ट्राचे उपमुख्यमंत्री अजित पवार यांनी गुरुवारी जिल्हा प्रशासन आणि आपत्ती व्यवस्थापन विभागाला सतर्कतेचा इशारा दिला आहे. त्यांनी जिल्हा प्रशासन आणि आपत्ती व्यवस्थापनाला सतर्क राहण्यास सांगितले. तसेच बाधित भागातील लोकांना मदत देण्याचे निर्देश दिले.
उपमुख्यमंत्री अजित पवार यांनी जिल्हाधिकारी आणि आपत्ती निवारण प्राधिकरणाच्या प्रमुखांकडून पुण्यातील परिस्थितीची माहिती घेतली. पुण्यात अतिवृष्टीमुळे झालेल्या नुकसानीचेही त्यांनी मुल्यांकन केले. याशिवाय पूरग्रस्त भागात अडकलेल्या लोकांना सुरक्षित स्थळी नेण्याचे निर्देश त्यांनी दिले.
पुण्यात गेल्या काही दिवसांपासून मुसळधार पाऊस पडत आहे. त्यामुळे खडकवासला, पिंपरी चिंचवड आणि पुण्यातील ग्रामीण भाग जलमय झाला आहे. मुसळधार पावसाच्या पार्श्वभूमीवर प्रशासनाकडून ग्रामस्थांना सावधगिरी बाळगण्यासाठी सातत्याने घोषणा केल्या जात आहेत. ग्रामस्थांना पूरग्रस्त भागापासून दूर राहण्यास सांगण्यात आले आहे.
दरम्यान, पुण्यातील मुसळधार पावसाची परिस्थिती पाहता एनडीआरएफच्या तीन तुकड्या तैनात करण्यात आल्या आहेत. राष्ट्रीय आपत्ती प्रतिसाद दलाने सांगितले की, दोन टीम एकता नगरमध्ये आणि एक टीम सिंहगड रोडमध्ये तैनात करण्यात आली आहे. गुरुवारी पहाटे विजेच्या धक्क्याने तीन तरुणांना जीव गमवावा लागला.
पुण्यात मुसळधार पावसामुळे शहरातील अनेक भागात पाणी शिरले आहे. सिंहगड रोड परिसरातील 25 सोसायट्यांमध्ये पाण्यामुळे हजाराहून अधिक लोक अडकून पडले आहेत. मुसळधार पावसामुळे 40 दुचाकी आणि पाच कार वाहून गेल्याचे सांगण्यात येत आहे.