नागरिकांच्या तक्रारीची दखल न घेतल्यास नागरिकांनी थेट पोलीस आयुक्तांना त्यांची तक्रार व्हाट्स ॲप करावी...पोलीस आयुक्त अंकुश शिंदे

 पोलीस आयुक्त अंकुश शिंदे यांनी घेतलेल्या या निर्णयामुळे प्रभारी अधिकाऱ्यांचे धाबे दणाणले..

प्रेस मीडिया लाईव्ह :

अनवर अली शेख :

पिंपरी : पिंपरी चिंचवड शहरात नव्या पोलीस आयुक्तांनी पदभार घेतल्यानंतर आयुक्तांनी लगेचच दुसरा बदल केला आहे. पहिल्याच दिवशी सामाजिक सुरक्षा पथक बरखास्त केल्यानंतर आता स्थानिक पोलिसांनी तक्रारदारांचे म्हणणे ऐकून न घेतल्यास, नागरिकांच्या तक्रारीची दखल न घेतल्यास नागरिकांनी थेट पोलीस आयुक्तांना त्यांची तक्रार व्हाट्स ॲप करावी, असे आवाहन करत पोलीस आयुक्तांनी व्हाट्सअप नंबर जाहीर केला आहे.

अकुश शिंदे यांची 20 एप्रिल रोजी पिंपरी चिंचवड पोलीस आयुक्त पदावर बदली झाली. त्यांनी तात्काळ पोलीस आयुक्त पदाची सूत्रे हाती घेतली. पहिल्याच दिवशी आयुक्त अंकुश शिंदे यांनी सामाजिक सुरक्षा पथक बरखास्त केले. त्यांनतर पोलीस आयुक्तांनी सर्व पोलीस ठाणे व गुन्हे शाखेच्या कामगिरीचा आढावा घेतला. आयुक्तांनी सर्व पोलीस अधिकारी आणि कर्मचाऱ्यांनी कोणत्याही आमिषाला बळी पडू नये. यापुढे पोलीस ठाणे अथवा विविध शाखांमध्ये लाचलुचपत प्रतिबंधक विभागाने छापा मारल्यास संबंधित प्रमुखाला जबाबदार धरण्यात येईल, अशी तंबी दिली. आयुक्तांच्या या आदेशाने पिंपरी चिंचवड पोलीस दलात एकच खळबळ उडाली.

आता थेट व्हाट्सॲपवर तक्रार....

आता पोलीस आयुक्तांनी व्हाट्सॲप क्रमांक जाहीर केला आहे. हा क्रमांक सर्व पोलीस ठाण्यांमध्ये लावण्यात आला आहे. 'पोलीस स्टेशन येथे जर आपली तक्रार घेतली नाही, तर सदरची तक्रार 9307945182 या नंबरवर व्हाट्सअपद्वारे करावी,' असे पोलीस ठाण्यांत लावलेल्या फलकांवर नमूद केले आहे.स्थानिक पोलिसांनी नागरिकांच्या तक्रारींची दखल घेतली नाही, तर नागरिकांना थेट पोलीस आयुक्त कार्यालयाकडे व्हाट्सअपद्वारे तक्रार करता येणार आहे. या तक्रारींची दखल सहाय्यक पोलीस आयुक्त दर्जाच्या अधिकाऱ्यांकडून घेतली जाणार आहे. तक्रारीची शहनिशा करून स्थानिक पोलिसांना विचारणा होणार आहे. त्यानंतर तक्रारदाराच्या तक्रारींचे निवारण करण्याचा प्रयत्न पोलीस आयुक्त कार्यालयाकडून होणार आहे.पोलीस आयुक्त अंकुश शिंदे यांनी घेतलेल्या या निर्णयामुळे प्रभारी अधिकाऱ्यांचे धाबे दणाणले आहेत. 

अनवर अली शेख : (सह संपादक )