क्राइम न्यूज : कौटुंबिक वादातून मुलीने लोखंडी गजाने जबर मारहाण करून पित्याचा केला निर्घृण खून .

शिवाजीनगरचे पोलिस निरीक्षक महादेव वाघमोडे तपास करत आहेत.

प्रेस मीडिया लाईव्ह :

इचलकरंजी :  कौटुंबिक वादातून मुलीने लोखंडी गजाने जबर मारहाण करून पित्याचा निर्घृण खून केला. शांतिनाथ अण्णाप्पा केटकाळे (वय 45, रा.बर्गे मळा) असे मृताचे नाव आहे. मंगळवारी रात्री नऊ वाजण्याच्या सुमारास त्यांच्या घरीच ही घटना घडली. संशयित मुलीसह तिच्या आईला पोलिसांनी ताब्यात घेतले आहे. रात्री उशिरापर्यंत शिवाजीनगर पोलिस ठाण्यात गुन्हा नोंद करण्याचे काम सुरू होते.

बर्गे मळा परिसरात शांतिनाथ केटकाळे हे आई, पत्नी सुजाता व तीन मुलींसह राहतात. रात्री त्यांच्या घरात वाद झाला. तेव्हा चिडून मोठ्या मुलीने त्यांच्या डोक्यात लोखंडी गजाने वार  केला. त्यामुळे डोक्याच्या पाठीमागील बाजूचा चेंदामेंदा झाला. केटकाळे यांच्या आईने आरडाओरडा केला. तेव्हा नागरिकांनी तेथे धाव घेतली. त्यावेळी संशयित मुलीने आईसह घराबाहेर धाव घेतल्याचे नागरिकांच्या निदर्शनास आले.

केटकाळे यांना तत्काळ खासगी रुग्णालयात व तेथून इंदिरा गांधी इस्पितळात दाखल करण्यात आले. मात्र, उपचारापूर्वीच त्यांचा मृत्यू झाल्याचे वैद्यकीय अधिकार्‍यांनी स्पष्ट केले. कौटुंबिक वादातून हा खून झाल्याचा पोलिसांचा प्राथमिक अंदाज आहे. मृत केटकाळे हे शेती काम करीत होते. नुकतेच त्यांनी साक्षी या मुलीला घरानजीकच केवा मार्ट सुरू करून दिला होता. मुलगी साक्षी व तिची आई सुजाता या दोघींना पोलिसांनी ताब्यात घेतले आहे. घटनास्थळी अप्पर पोलिस अधीक्षक जयश्री गायकवाड, पोलिस उपअधीक्षक बाबुराव महामुनी यांनी भेट दिली. शिवाजीनगरचे पोलिस निरीक्षक महादेव वाघमोडे तपास करत आहेत.