प्रेस मीडिया वृत्तसेवा :
हॉटेल, रेस्टॉरंटना वेळ वाढवून द्यावी अशी मागणी होत आहे. यासंदर्भात हॉटेल व्यावसायिक संघटनांच्या झालेल्या बैठकीत मुख्यमंत्री उद्धव ठाकरे यांनी ज्या जिह्यांत निर्बंध शिथिल करण्यात आले आहेत तेथील परिणामांचा तसेच कोरोनाची गंभीर स्थिती असलेल्या जिह्यांचा आढावा घेण्यात येईल. त्यानंतरच हॉटेल आणि रेस्टॉरंट व्यावसायिकांना वेळ वाढवून देण्याबाबत निर्णय घेण्यात येईल, असे आश्वासन दिले.
'वर्षा' या शासकीय निवासस्थानी राज्यातील हॉटेल आणि रेस्टॉरंट व्यावसायिकांच्या इंडियन हॉटेल अॅण्ड रेस्टॉरंट्स असोसिएशन-आहार तसेच हॉटेल ओनर्स असोसिएशन, एनआरएई या संघटनांच्या प्रतिनिधींच्या शिष्टमंडळासमवेत आयोजित बैठकीत मुख्यमंत्री उद्धव ठाकरे बोलत होते.ते म्हणाले, आपल्याला सर्व गोष्टी पूर्वीप्रमाणेच सुरळीत आणि नेहमीप्रमाणे सुरू करायच्या आहेत. आता आपण पहिल्या टप्प्यात काही निर्बंध शिथिल केले आहेत. त्यामध्ये आऊटडोअर म्हणजेच मोकळ्या जागांवरील व्यवहारांवरील बंधने कमी केली आहेत. पण इनडोअर अशा गोष्टींबाबत सावधपणे पावले टाकावी लागतील. दुसऱया लाटेत ऑक्सिजनची मोठी गरज भासली. पुढे तिसऱया लाटेतही रुग्णसंख्या वाढली तर ऑक्सिजनची मागणी वाढू शकते, असे केंद्रीय यंत्रणांनी स्पष्ट केले आहे. याबाबत आताही मोठी रुग्णसंख्या असलेल्या जिह्यांचाही ऑक्सिजन उपलब्धतेबाबत आढावा घेण्यात येणार आहे. निर्बंध शिथिलतेनंतर संसर्ग आणि रुग्णसंख्या यांचाही आढावा घेतला जाणार असल्याचे सांगितले.
यावेळी टास्क फोर्सचे डॉ. शशांक जोशी यांनी हॉटेल व्यावसायिकांनी कर्मचाऱयांचे लसीकरण करावे, वातानुकूलन प्रणाली बंद करून हवेशीर व्यवस्था करावी हे सांगतानाच स्वच्छतागृहांची रचना याबाबतही सूचना केल्या.
'वर्षा' येथील समिती सभागृहात झालेल्या या बैठकीत राज्याचे मुख्य सचिव सीताराम कुंटे, सार्वजनिक आरोग्य विभागाचे अतिरिक्त मुख्य सचिव डॉ. प्रदीप व्यास, मुख्यमंत्र्यांचे अतिरिक्त मुख्य सचिव आशिषकुमार सिंह, पर्यटन विभागाच्या प्रधान सचिव वल्सा नायर-सिंह, मुख्यमंत्र्यांचे प्रधान सचिव विकास खारगे, कोविड टास्क फोर्सचे डॉ. शशांक जोशी तसेच हॉटेल व रेस्टॉरंट व्यावसायिकांच्या एएचएआर संघटनेचे शिवानंद शेट्टी, एनआरएआर संघटनेचे अनुराग कटरियार, डॉ. पी. व्ही. शेट्टी, रवी शेट्टी, राकेश शेट्टी, सुकेश शेट्टी आदी उपस्थित होते.