प्रेस मीडिया वृत्तसेवा :
इचलकरंजी ता. १२ ,कोरोनाच्या अभूतपूर्व संकटाने समाजाच्या विविध क्षेत्रावर मोठे हल्ले केले आहेत. त्यामध्ये समाजाची सांस्कृतिक व वैचारिक उंची मोजण्याचे महत्वाचे परिमाण असणाऱ्या सार्वजनिक ग्रंथालय क्षेत्राचीही मोठी हानी झाली आहे. ज्ञानदानाची सांस्कृतिक केंद्रे व समाज एकमेकांपासून दुरावणे हे कोणत्याही काळात अराजकतेला आमंत्रण असते. सार्वजनिक ग्रंथालयांचा उपयोग समाजातील प्रत्येक घटकाने करून ग्रंथालय चळवळ ही सामाजिक जीविताची चळवळ बनवली पाहिजे.आजच्या एकूणच सार्वत्रिक अस्वस्थतेच्या वातावरणात ग्रंथच आधार देऊ शकतात. म्हणूनच व्यक्ती विकासातून राष्ट्र विकासाची चळवळ पुढे नेणे हीच डॉ.एस.आर.रंगनाथन यांना खरी आदरांजली ठरेल,असे मत प्रसाद कुलकर्णी यांनी व्यक्त केले. ते समाजवादी प्रबोधिनी आणि प्रबोधन वाचनालयाच्या वतीने भारतीय ग्रंथालय शास्त्राचे जनक डॉ.एस. आर. रंगनाथन यांच्या जन्मदिनाच्या कार्यक्रमात बोलत होते.प्रारंभी डॉ.एस.आर.रंगनाथन यांच्या प्रतिमेला बाळकृष्ण शेवडे यांच्या हस्ते पुष्पहार अर्पण करण्यात आला.
यावेळी डॉ.एस.आर.रंगनाथन यांचे भारतीय ग्रंथालय चळवळीतील योगदान, कोरोना व लॉकडाऊन मुळे गेल्या दीड वर्षापैकी जवळजवळ एक वर्षभर बंद असलेली सार्वजनिक ग्रंथालये, त्यातून निर्माण झालेली गंभीर आव्हाने, वाचकांच्या सक्रिय सहभागाची गरज , ग्रंथालय चळवळ टिकवण्यासाठी शासकीय व सामाजिक प्रयत्नांच्या पराकाष्ठेची गरज आदी विषयांचा उहापोह करण्यात आला.यावेळी प्रबोधन वाचनालयातील ग्रंथालय सेवकांना गुलाबपुष्प देऊन शुभेच्छा देण्यात आल्या.