प्रेस मीडिया वृत्तसेवा :
मोक्का गुन्ह्यातील फरार असलेल्या माहिती अधिकार कार्यकर्ता रवींद्र बऱ्हाटे याच्या मुस्क्या आवळण्यासाठी पुणे पोलिसांकडून हालचालींना वेग आला आहे. गुन्हे शाखेच्या विविध पथकांकडून खास प्लॅन तयार करण्यात आला आहे. त्यानुसार त्याला पकडण्यासाठी शोधमोहिम प्रगतीपथावर आहे. त्यामुळे मागील दीड वर्षांपासून पुणे पोलिसांना गुंगारा देउन सोशल मीडियाद्वारे अ‍ॅक्टीव असलेला बऱ्हाटे जास्त वेळ लपू शकत नसल्याची माहिती एका वरिष्ठ अधिकाऱ्याने दिली आहे.
शहरातील अनेक नागरिकांची फसवणूक करून त्यांची जमीन बळकाकविणे, धमकी देउन प्रॉपर्टी स्वतःसह टोळीच्या नावावर करून घेणे, धमक्यांना भीक न घालणाऱ्यांना थेट गोळ्या घालण्याचा इशारा देणे, बदनामी करणे यासह संपत्ती हडप करण्याचा प्रयत्न करणारा आरोपी रविंद्र बऱ्हाटे याला पकडण्यासाठी गुन्हे शाखेच्या पथकांकडून टास्कफोर्स प्लॅन तयार करण्यात आला आहे.त्यानुसार त्याचा सोशल मीडिया हँडल करणारे लोक, छुप्या पद्धतीने फोनवर संपर्क साधणारे, त्याशिवाय बऱ्हाटेने फेसबुकवर अपलोड केलेले व्हिडिओ वारंवार पाहून लाईक करणाऱ्यांची कुंडली तपासण्यात येत आहे. संबंधितांवर वॉच ठेउन कारवाईचा बडगा उगारण्यात येणार आहे. गुन्हे शाखेच्या पथकांकडून बऱ्हाटेच्या प्रत्येक बारीक-सारीक गोष्टींवर लक्ष केंद्रीत करण्यात आले आहे.
खंडणी मागणे, फसवणूक आणि जमीन बळकाविण्याच्या 12 गुन्हयांमध्ये बऱ्हाटे दीड वर्षांपासून फरार आहे. त्यापैकी तीन गुन्ह्यांमध्ये त्याच्याविरूद्ध मोक्कानुसार कारवाई करण्यात आली आहे. काही दिवसांपूर्वी त्याने फेसबुकवर व्हिडिओ प्रसारित करून पोलिसांवर आरोपी केले होते. त्यानंतर पोलिसांनी बऱ्हाटेला मदत करणाऱ्यांचा ठावठिकाणा शोधण्यास सुरुवात केली होती. त्यानुसार कटात सहभागी असल्याचा ठपका ठेउन पोलिसांनी बऱ्हाटेची पत्नी संगीता आणि मुलगा मयूरला अटक केली. चौकशीत फेसबुकवर अपलोड केलेल्या व्हिडिओसंदर्भात महत्वाचे धागेदोरे पोलिसांच्या हाती लागले आहेत. दरम्यान, याप्रकरणी प्राथमिक चौकशीत अ‍ॅड सुनील मोरे यांनीही बऱ्हाटेला मदत केल्याचे दिसून आले. त्यानुसार त्यांना शनिवारी अटक करण्यात आली आहे.
फेसबुकवर व्हिडिओ अपलोड केला अन चुकला
फरार झाल्यानंतर काही दिवसांपुर्वी पहिल्यांदा बऱ्हाटेने फेसबुकवर व्हिडिओ अपलोड करून चुक केली. त्यानुसार पोलिसांनी तांत्रिक विश्लेषणाद्वारे त्याच्या संपर्कात असलेल्यांची कुंडली तपासण्यात आली. त्यामध्ये सर्व व्हिडीओ व ऑडीओ तयार करून प्रसारीत करण्याच्या कामात आरोपी पितांबर धिवार याने बऱ्हाटेला मदत केल्याचे पोलिसांच्या तपासात समोर आल्यामुळे त्याला अटक केली आहे. त्याशिवाय बऱ्हाटेची पत्नी संगीता आणि मुलगा मयूर यांचा सहभाग असल्याचे दिसून आले. अ‍ॅड. मोरे यांनीही त्याला मदत केल्याचे निष्पन्न झाले. त्यानुसार पथकाने आतापर्यंत चौघांना अटक केली आहे. त्यामुळे बऱ्हाटेच्या मुस्क्या आवळण्याच्या दिशेने पोलिसांनी कठोर पाऊले उचलली असल्याची चर्चा नागरिकांमध्ये आहे.