मुंबई महानगरीत चित्रीकरणावर असलेले निर्बंध आज सशर्त उठविण्यात आले आहेत. मुख्यमंत्री उद्धव ठाकरे यांच्यासोबत झालेल्या बैठकीत शूटिंगला परवानगी देण्यात आली

प्रेस मीडिया वृत्तसेवा : 

मुंबई महानगरीत चित्रीकरणावर असलेले निर्बंध आज सशर्त उठविण्यात आले आहेत. मुख्यमंत्री उद्धव ठाकरे यांच्यासोबत झालेल्या बैठकीत शूटिंगला परवानगी देण्यात आली. कोणताही निष्काळजीपणा परवडणार नाही. कोरोनाविषयक नियमांचे पालन व्हायलाच हवे. मुंबई आणि परिसरातील चित्रीकरणासाठी पोलिसांशी समन्वय ठेवावा, असे स्पष्ट निर्देश मुख्यमंत्री उद्धव ठाकरे यांनी आज दिले आहेत.

चित्रपट निर्मात्यांची सर्वात मोठी संस्था असलेल्या प्रोडय़ुसर्स गिल्डच्या पदाधिकाऱयांशी मुख्यमंत्री उद्धव ठाकरे यांनी आज दूरदृश्य प्रणालीद्वारे संवाद साधला. यावेळी मुख्यमंत्री ठाकरे म्हणाले, निर्बंध टाकून तुम्हाला अडविणे आम्हालाही आवडत नाही, पण महाराष्ट्र आणि केरळसह देशातील इतर काही राज्यांमधून कोरोनाचा संसर्ग अजूनही आहे.कोरोनाच्या दुसऱया लाटेतूनदेखील आपण पूर्णपणे बाहेर आलेलो नसून जगातील इतर देशांत परत तिसरी लाट उसळल्याचे दिसते, त्यामुळे आपल्याला आरोग्याच्या नियमांची पूर्ण काळजी घेत राहणे आवश्यक असल्याचेही त्यांनी सांगितले. यावेळी प्रोडय़ुसर गिल्डच्या पदाधिकाऱयांनी निर्देशांचे पालन करून चित्रीकरण पार पाडू, अशी ग्वाही दिली.

निर्मांत्यांचे म्हणणे

गेल्या काही महिन्यांपासून हिंदी व मराठी चित्रपट आणि मालिकांचे निर्माते कोरोना काळात नियमांचे पालन करून चित्रीकरण करीत आहेत, परंतु चित्रीकरणाच्या वेळेत वाढ करणे गरजेचे आहे. सायंकाळी 4 नंतरदेखील चित्रीकरण करण्यास परवानगी मिळाल्यास सर्वतोपरी काळजी घेऊन व नियमांचे पालन करून चित्रीकरण करता येणे शक्य आहे, असे प्रोडय़ुसर गिल्डचे म्हणणे होते.

या बैठकीस हिंदी चित्रपट निर्मात्यांच्या प्रमुख संस्था असलेल्या प्रोडय़ुसर गिल्डचे रितेश सिधवानी, स्तुती रामचंद्र, मधु भोजवानी, राकेश मेहरा, नितीन आहुजा हे सहभागी झाले होते. त्याचप्रमाणे सुबोध भावे, नागराज मंजुळे, रवी जाधव यांनीही बैठकीत सहभागी होऊन सूचना केल्या. आदेश बांदेकर यांनी बैठकीचे सूत्रसंचालन केले.

बैठकीत काय ठरले

पथकातील कुणाला ताप जरी आला असेल किंवा काही लक्षणे दिसत असतील तर त्वरित दखल घेणे आणि सर्वांचे दोन्ही डोसेससह लसीकरण असणे गरजेचे आहे.
मुंबई आणि महाराष्ट्रातील चित्रपटनिर्मात्यांनी कोविडसंदर्भात आपल्या कलाकार व कर्मचाऱयांची ठराविक दिवसांनंतर कोरोना चाचणी करीत राहणे. मुंबई पोलिसांनी देखील प्रत्येक निर्मात्यांचे चित्रीकरणाचे वेळापत्रक, चित्रीकरण ठिकाण व वेळा याबाबतची माहिती निर्मात्यांकडून मागवून घ्यावी आणि एखाद्या अधिकाऱयांवर समन्वयाची जबाबदारी टाकून व्यवस्थित व नियमांची काळजी घेत असल्याची खात्री करून परवानगी द्यावी, असे निर्देश मुख्यमंत्र्यांनी यावेळी दिले.

निर्बंध उठवताना सर्वांचे सहकार्य हवे

निर्बंध कायम न ठेवता कोरोना परिस्थितीची पाहणी करून टप्प्याटप्प्याने, सावधपणे आणि सुरक्षितरीत्या ते उठविण्याबाबत सरकार पावले टाकत आहे. पण यासाठी सर्वांचे मोठे सहकार्य लागणार आहे, असेही मुख्यमंत्री उद्धव ठाकरे म्हणाले. यावेळी टास्क पर्ह्सचे डॉक्टर संजय ओक, डॉ. शशांक जोशी, अतिरिक्त मुख्य सचिव आरोग्य डॉ. प्रदीप व्यास यांनीदेखील कोरोनाच्या सद्य परिस्थितीबाबत माहिती दिली. पोलीस आयुक्त हेमंत नगराळे यांनादेखील यावेळी पोलिसांतर्फे नियमांचे काटेकोर पालन करण्यात येत असल्याचे सांगितले.