क्राईम चेक टाईम वेबपोर्टलचे पत्रकार असल्याचे सांगून एक हजार रुपये घेऊन पुन्हा पाच हजारांची खंडणी मागणाऱ्या महिलेसह दोघा कथित पत्रकारांना खडकी पोलिसांनी अटक केली.

प्रेस मीडिया वृत्तसेवा : 

परमिट रूममध्ये जाऊन क्राईम चेक टाईम वेबपोर्टलचे पत्रकार असल्याचे सांगून एक हजार रुपये घेऊन पुन्हा पाच हजारांची खंडणी मागणाऱ्या महिलेसह दोघा कथित पत्रकारांना खडकी पोलिसांनी काल दुपारी अटक केली. याप्रकरणी सतपाल सिंग अमरसिंग बग्गा (57, रा. वाघोली) आणि त्याच्या साथीदार महिलेला अटक करण्यात आली.

शंकरशेठ रस्त्यावरील सेव्हन लव्हज चौकात एका व्यक्तिचे परमिट रूम आहे. काल दुपारी क्राईम चेक टाईमचे ओळखपत्र गळ्यात घालून सतपाल बग्गा याच्यासह एक महिला त्यांच्या परमिटरूममध्ये गेली. तुम्ही अवैधरित्या दारूची विक्री करीत आहात, लोकांना परमिटरूममध्ये बसवून दारू विक्री करीत आहात. हे प्रकरण मिटवायचे असल्यास एक हजार रुपये द्या, अशी मागणी करून त्यांनी रक्कम स्वीकारली.त्यानंतर आरोपींनी परमिट रूम मालकाला फोन करून पुन्हा पाच हजारांची खंडणी मागितली.

याबाबत परमिट रूम मालकाने खडकी पोलीस ठाण्यात तक्रार केली. त्यानुसार पोलिसांनी सापळा रचून त्यांना अटक केली. याप्रकरणी संबंधित आरोपींकडील ओळखपत्रे आणि त्यांच्या वेबपोर्टलसंदर्भात माहिती घेण्यात येत आहे, असे सहायक पोलीस निरीक्षक चंद्रकांत गोसावी यांनी सांगितले.